क्रसर उद्योगको मापदण्ड कार्यान्वयन गर्न विकास समितिको जोड

गण्डकी प्रदेशका क्रसरहरुमा मापदण्ड कार्यान्वयन गराउन प्रदेश सभाको अर्थ तथा विकास समितिले माग गरेको छ । समितिले आयोजना गरेको भर्चुअल वैठकमा सहभागीहरुले मापदण्ड बिपरित क्रसरहरु सञ्चालन हुनु दुःखद् भएको बताउँदै मापदण्ड कार्यान्वयन गर्न दबाव दिएका छन् । समितिले क्रसरका मापदण्ड कार्यान्वयनमा भूमिका खेल्ने पक्षहरुबीच आयोजना गरेको बैठकमा सहभागीहरुले मापदण्ड कार्यान्वयन गर्न नसक्ने हो भने मापदण्ड संसोधन गर्नपनि चुनौति हुने बताए ।

बैठकमा विषय प्रवेश गराउँदै संसदको अर्थ तथा विकास समितिका सभापति दीपक कोइरालाले गण्डकी प्रदेशका क्रसरहरु मापदण्ड बिपरित सञ्चालन भइरहेको बताउनु भयो । कुनैपनि क्रसरहरु मापदण्ड अनुसार सञ्चालन छैनन् यसले सरकार,सांसद जनप्रतिनिधि सवैलाई जनताले आशंका गर्ने ठाउँ बनाएको भन्दै उहाँले मापदण्ड दृढतापूर्वक कार्यान्वयन गर्नुपर्नेमा जोड दिनु भयो ।

मापदण्ड कार्यान्वयन नगरेको प्रति सांसद ईन्द्रलाल सापकोटाले स्थानीय तह र सरकारकै नजिकका आसेपासेहरुले क्रसर उद्योग सञ्चालन गरेका हुदा मापदण्ड कार्यान्वयनमा नआएको हुन सक्ने आशंका ब्यक्त गर्नुभयो । सांसद जनकलाल श्रेष्ठले मापदण्ड कार्यान्वयन गराउन आफ्नो समितिले निरन्तर खबरदारी गरिरहने बताउनु भयो ।(जिसस) तनहुँका प्रमुख शान्तिरमण वाग्लेले जिससलाई अनुगमनको अधिकार भएपनि कार्वाही गर्ने अधिकार नै छैन, कार्वाहीको लागि सिफारिस गर्दापनि स्थानीय तहले कार्यान्वन नगर्ने गरेको बताउनु भयो । पर्वतका जिसस प्रमुख मनोहर विश्वकर्मा पौडेलले पर्वतमा पनि क्रसरमा समस्या रहेको बताउनु भयो । पर्वतमा चोरी निकासी बढी भएको भन्दै प्रदेशबाट पनि अनुगमन वेला वेला गरिदिनको लागि आग्रह गर्नुभयो । स्याङ्जा जिसस प्रमुख सिता सुन्दासले स्याड्जामा पनि मापदण्ड अनुसार क्रसर सञ्चालनमा नरहेको बताउदै संघ र प्रदेशको मापदण्ड एकरुपता हुन आबश्यक रहेको बताउनु भयो ।

बैठकमा उद्योग, पर्यटन, वन तथा वातावरण मन्त्री विकास लम्सालले क्रसरका मापदण्ड दृढतापूर्वक कार्यान्वयन गर्ने प्रतिबद्धता जनाउनु भएको छ । असोज १ गतेपछि क्रसरहरुको तालिका बनाएर नियमित अनुगमन गर्ने बताउँदै उहाँले भन्नु भयो ,‘क्रसरका मापदण्ड हेरफेर हुँदैन, अहिले भएकै मापदण्ड दृढतापूर्वक कार्यान्वयन हुन्छ।’ उहाँले मापदण्ड लागू नगर्ने क्रसर उद्योगहरुलाई कार्वाही गर्ने चेतावनीसमेत दिनु भएको छ । मापदण्ड लागू नगर्ने क्रसर उद्योग बन्द गर्ने बताउनु भयो । उहाँले नियमविपरित खोलामा डोजर चलाएको देखे पक्राउ गरेर कार्वाही गर्ने जनाउनु भयो । वैठकमा बाग्लुङका जिसस अधिकारी , नवलपुरका जिसस अधिकारी लगायतले पनि आफ्नो जिल्लामा क्रसर उद्योगको अवस्था बारे जानकारी गराउनु भएको थियो ।

प्रकाशित मितिः बिहिबार, भदौ २५, २०७७     10:16:03 AM

Tara Chapagain

See all posts by