चुनावी घोषणापत्र बनाउन एमाले, माओवादी र नयाँ शक्तिको संयुक्त कार्यदल गठन

१८ असोज, काठमाडौं ,

चुनावी तालमेल गर्ने सहमति गरेका एमाले, माओवादी केन्द्र र नयाँ शक्तिले प्रदेश सभा र प्रतिनिधि सभा निर्वाचनको लागि चुनावी घोषणापत्र बनाउन कार्यदल गठन गरेको छ ।

पार्टी एकता संयोजन समितिको बुधबार बसेको बैठकले उम्मेदवार चयनका लागि पनि ३ वटै पार्टी सम्मिलित निर्वाचन क्षेत्र उम्मेदवार निर्धारण समिति पनि बनाएको छ । एमाले उपाध्यक्ष बामदेव गौतमको भैंसेपाटीस्थित निवासमा बुधबार बसेको बैठकले एमाले महासचिव इश्वर पोखरेल नेतृत्वको ७ सदस्यीय निर्वाचन क्षेत्र उम्मेदवार निर्धारण कार्यदल बनाएको हो ।

कार्यदललाई ६० प्रतिशत एमाले, ४० प्रतिशत माओवादी केन्द्र हुने गरी प्रत्यक्षतर्फको उम्मेदवार तय गर्ने जिम्मेवारी दिइएको छ । कार्यदलमा एमालेका महासचिव पोखरेल, नेताहरु विष्णु पौडेल, सुरेन्द्र पाण्डे, माओवादी केन्द्रका वरिष्ठ नेता रामबहादुर थापा, नेताहरु वर्षमान पुन र मातृका यादव तथा नयाँ शक्ति पार्टीका नेता गंगा श्रेष्ठ रहेको एमाले उपाध्यक्ष गौतमले जानकारी दिए ।

त्यसैगरी चुनाव घोषणा पत्र मस्यौदा कार्यदलमा एमालेबाट उपाध्यक्ष बामदेव गौतम, भीम रावल, प्रदिप ज्ञवाली, माओवादी केन्द्रबाट वरिष्ठ नेता नारायणकाजी श्रेष्ठ, देव गुरुङ, विश्वभक्त दुलाल तथा नयाँ शक्ति पार्टी नेपालबाट डम्बर खतिवडा र डा. लक्ष्मी देवकोटा छन् ।

पार्टी एकता संयोजन समितिले समानुपातिक तर्फको उम्मेदवारी भने आ-आफ्नै दलको तर्फबाट दिने निर्णय पनि गरेको छ । समानुपातिक तर्फको उम्मेदवारी आ-आफनै पार्टीको तर्फबाट दिने निर्णय गरिएकेा पनि एमाले उपाध्यक्ष बामदेव गौतमले जानकारी दिए ।

आगामी असोज २९ गते प्रदेश सभा र प्रतिनिधि सभा निर्वाचनको समानुपातिक तर्फका उम्मेदवारी निर्वाचन आयोगमा बुझाउनुपर्ने हुन्छ ।अनलाइनखबर

प्रकाशित मितिः बुधबार, अशोज १८, २०७४     8:58:30 PM

Tara Chapagain

See all posts by