बेनी–जोमसोम सडक अवरुद्ध

मुस्ताङ, वैशाख ७

बेगखोलामा बाढी आएपछि बेनी–जोमसोम सडक बुधबार बेलुकादेखि अवरुद्ध बनेको छ । बुधबार दिउँसोको भारी वर्षापछि बेगखोलाको ठाडोखोलामा बाढी आउनुका साथै कालीगण्डकीको सतह बढेर सडक कटान हुन थालेपछि बेनी–जोमसोम सीदा सवारी आवागमन ठप्प बनेको हो ।

बुधबार बेलुकादेखि नै मुस्ताङ र म्याग्दीको अन्नपूर्ण गाउँपालिकाअन्तर्गत पर्ने विभिन्न गाउँबाट सदरमुकाम आउने र देशका विभिन्न भागबाट ती क्षेत्रमा जाने यात्रु मर्कामा परेका छन् । घन्टाैं कुर्दासमेत पानी सतह नघटेपछि तिब्ल्याङ र बेनीमै फर्कन बाध्य भएको तिब्ल्याङका स्थानीय बासिन्दा प्रेम पुर्जाले जानकारी दिनुभयो ।

बेगखोलाको ठाडोखोलामा गत वर्षको भदौमा आएको भीषण बाढीले त्यहाँका १२ घर बगाउनुका साथै बेलिब्रिज पनि बगाएको थियो । माथिल्लो क्षेत्रमा वर्षा हुनेबित्तिकै बेगखोलामा बाढी आउने गरेको छ । बेनी–जोमसोम हुँदै मुस्ताङ आउने आन्तरिक तथा बाह्य पर्यटकको चाप उच्च छ । पोखरा, बेनी र काठमाडौंबाट सीदा जोमसोम र मुक्तिनाथका लागि जिप र माइक्रोबस छुट्न थालेपछि सवारीमा यात्रा गर्ने पर्यटकको सङ्ख्या ह्वात्तै बढेको छ ।

चैत, वैशाख र जेठ मुस्ताङ भ्रमणको याम मानिन्छ । गएकाे वर्ष बाढीले ल्याएका ठूल्ठूला ढुङ्गाले कालीगण्डकीको सतहमाथि उठेको र वर्षा हुने बित्तिकै ठाडाखोलामा बाढी सडक अवरुद्ध हुने गरेको म्याग्दी जीप तथा बस सञ्चालक समितिका सचिव सुमन श्रेष्ठले जानकारी दिनुभयो ।

 

 

प्रकाशित मितिः बिहिबार, बैशाख ७, २०७४     9:25:27 AM

Tara Chapagain

See all posts by